Nadležni sud u Grčkoj odlučio je da pusti prvu grupu od 20 navijača "Dinama" iz Zagreba, koji su od avgusta u grčkim zatvorima zbog ubistva navijača.
Hrvatski mediji javljaju da je od ukupno 105 navijača 20 pušteno uz pojedinačnu kauciju od po 1.000 eura.
Ministar pravosuđa i uprave Ivan Malenica izrazio je uvjerenje da bi do Božića svi uhapšeni hrvatski državljani iz Grčke trebali da dođu u Hrvatsku.
"Mislim da je u ovom trenutku najbitnije da su krenula rješenja o prekidu istražnog zatvora. Apelovao bih na strpljenje kod samih navijača, ali isto tako i kod roditelja i prijatelja", rekao je Malenica.
Navijači "Dinama", odnosno 105 pripadnika navijačke grupe "BBB", uhapšeno je u avgustu nakon uličnih obračuna s navijačima AEK-a u kojima je od uboda nožem poginuo Mihalis Kacuris.